काठमाडौँ, ९ असोज ।
बसुन्धरामा रहेको ग्रिनसिटी अस्पतालले दुई बालबालिकाको मुटुको निःशुल्क शल्यक्रिया गरेको छ । अस्पतालले आज एक पत्रकार सम्मेलन गरी कालीकोट जिल्ला घर भएका ११ वर्षीय टेक विश्वकर्मा र १३ वर्षीया चरित्र धमलाको मुटुको शल्यक्रिया गरेको जानकारी दिएको हो ।
शल्यक्रियामा सङ्लग्न डाक्टर अनिल भट्टराईले पछिल्लो समयमा मुटुका बिरामी बढेको बताउनुभयो । उहाँले मोटा मान्छे, बढी धुम्रपान सेवन गर्ने, नुन धेरै मात्रामा खाने मानिसलाई मुटुको रोग लाग्ने गरेको बताउनुभयो ।
शल्यक्रियामा डा भट्टराईसँगै डा विश्वास प्रधान, डा विवश श्रेष्ठ र डा आशिष अमात्य रहनुभएको सम्मेलनमा जानकारी दिइयो । अस्पतालका कार्यकारी निर्देशक डा विष्णुप्रसाद गौतमले गरिबलाई मुटुको शल्यक्रिया महँगो भएकाले आफूहरुले निःशुल्क गरेको बताउनुभयो ।
नेसनल मुटु सेन्टरका कार्यकारी निर्देशक शेरबहादुर रानाले मुटु रोगबाट बर्से्नि थुप्रै मानिसले अकालमै ज्यान गुमाएको स्मरण गर्दै अब त्यस्तो नहोस् भन्नका लागि आफूहरु लागेको बताउनुभयो ।
