काठमाडौ, ९ असोज ।
रेडपाण्डाको प्रजनन समय भएको भन्दै दार्जिलिङको वन विभागले तीन महिनादेखि लगाएको पर्यटक प्रतिबन्ध खुल्ला गरेको छ ।
दार्जिलिङको सिंहलिला नेसनल पार्कमा रहेका रेडपाण्डा र विभिन्न जनावर र चराचुरुङ्गीको प्रजननमा असर नपुगोस् भन्ने उदेश्यले प्रत्येक वर्ष तीन महिनाका लागि पर्यटक प्रतिबन्ध लगाउने गरिएको छ ।
पार्कले इलामको तुम्लिङदेखि पाँचथरको फालोटसम्मको नेसनल पार्क क्षेत्रभित्रको पदमार्गमा पर्यटक हिँडडुलमा प्रतिबन्ध लगाएको थियो । पदमार्ग खुल्ला गरेपछि रेडपाण्डा हेर्नका लागि अहिले पर्यटक आउनेक्रम बढेको स्थानीय छिरिङ फुञ्चोङ भोटियाले बताउनुभयो ।
ठूलो सङ्ख्यामा दार्जिलिङ, मिरिक लगायत भारतीय सहर हुँदै भारतीय र पश्चिमा पर्यटक सन्दकपुर पुग्न थालेका छन् ।
मानेभञ्ज्याङदेखि चित्रे, लामिधुरा, मेघमा, तुम्लिङ, जौवारी, गैरीबास, कैयाकट्टा, कालपोखरी, बिखेभञ्ज्याङ, सन्दकपुर हुँदै फ्यालुटसम्म पर्यटक पुग्ने गर्छन् ।
पर्यटन पदमार्ग भएर सीमा क्षेत्रका नेपाली पर्यटकीयस्थलमा ट्रेकिङका लागि भारतलगायत तेस्रो मुलुकका दर्जनौँ पर्यटक आवतजावत गर्न थालेका छन् ।
दुर्लभ रेडपाण्डा लगायत विश्वमा लोपोन्मुख वन्यजन्तु र चराचुरुङ्गीको प्रजनन र यौन क्रियाकलापको समय भएको भन्दै पार्कले पर्यटक आवगमनमा प्रतिबन्ध लगाएको थियो ।
