काठमाण्डौ,८ असोज ।
दाङको घोराहीमा रहेका सुन्नी मुस्लिम समुदायले आज वकर इद पर्व सडकमै मनाएका छन ।
घोराहीको फुर्सेखाली जाने सडक छेउमा रहेको कब्रस्थानमा नमाज पढ्ने विषयमा विवाद भएपछि सुन्नी समुदायका मुसलमानले घोराहीको नेपाल टेलिकम कार्यालयको अगाडि चौराहमा नमाज पढेका हुन ।
कब्रस्थान अर्थात् शवदाहस्थलमा पूजापाठ र नमाज पढ्ने विषयमा सुन्नी र वहबी समुदायका मुस्लिमबीच विवाद हँुदा स्थानीय प्रशासनले कब्रस्थानमा जान रोक लगाएपछि सुन्नी समुदायका मुसलमानले सकडमै नमाज पढेका हुन ।
उता वहबी समुदायका मुसलमानले नयाँ बजारको मदरसामा नमाज पढेका छन् । स्थानीय प्रशासनले विवाद मिलाउने र सुरक्षा दिनुपर्ने बेला पूजापाठ गर्ने कार्य रोकेको भन्दै सुन्नी समुदायका मुसलमानले आपत्ति जनाएका छन ।
कब्रस्थान रहेको करिब १६ कट्टा जग्गामा दुवै समुदायले वर्षौंदेखि पूजापाठ गर्दै आएका र अहिले वहबी समुदायको अलसल्फीया अहले हदिस समितिले शवदाह स्थलमा नमाज पढ्न नहुने भन्दै पुनरावेदन अदालतमा मुद्दासमेत दायर गरेको छ ।
तर अदालतले कब्रस्थानको भौतिक पूर्वाधार निर्माणमा घोराही नगरपालिकाबाट रु एक लाख र जनसहभागिता देखिएको भन्दै सगोलको सम्पत्ति भएकाले समानरुपले प्रयोग गर्न आदेश दिएको छ ।
