कञ्चनपुर, ७ असोज ।
विद्युत् कटौती नघटाएको भन्दै कञ्चनपुरका विभिन्न विद्यार्थी सङ्गठनले विद्युत् कार्यालय कञ्चनपुरका प्रमुखको कुर्सी जलाएका छन् ।
आज कञ्चनपुरका विभिन्न सङ्गठनले नेपाल विद्युत् प्राधिकरण वितरण केन्द्र महेन्द्रनगरका प्रमुख पुष्पराज पन्तको कुर्सी जलाएका हुन् ।
नेवि सङ्घ, अनेरास्ववियु, अखिल क्रान्तिकारी, वैद्य÷विप्लव क्रान्तिकारी र अखिल छैटौँ सम्बद्ध विद्यार्थी सङ्गठनले कुर्सी जलाएका हुन् ।
जिल्ला प्रहरी कार्यालय कञ्चनपुरका प्रहरी प्रवक्ता केदार खनालले विभिन्न विद्यार्थी सङ्गठनमा आबद्ध विद्यार्थीले एकाएक गएर कार्यालय प्रमुख पन्तको कुर्सी र टेलिफोनसमेत जलाएको जानकारी दिनुभयो ।
विद्युत् भार कटौतीमुक्त जिल्ला घोषणाको माग राख्दै आन्दोलनमा उत्रेका विद्यार्थी सङ्गठन र विद्युत् कार्यालयबीच सात दिनसम्म दैनिक दुई घन्टा मात्रै विद्युत् कटौती गर्ने र सात दिनभित्र एक कार्यदल बनाएर समस्या समाधान गर्ने सहमति भएपनि विद्युत् कटौती गरिएको भन्दै आक्रोशित विद्यार्थी आगजनीमा उत्रिएका हुन् ।
