काठमाडौँ, ५ असोज ।
राष्ट्रपति डा रामवरण यादव र प्रधानमन्त्री सुशील कोइरालाबीच आज भेटबार्ता भएको छ ।
राष्ट्रपति कार्यालय शीतलनिवासमा भएको भेटवार्तामा तराई–मधेसमा भइरहेको आन्दोलनलाई तत्काल सम्बोधन गर्ने सम्बन्धमा छलफल भएको राष्ट्रपतिका प्रेस सल्लाहकार राजेन्द्र दाहालले जानकारी दिनुभयो ।
प्रधानमन्त्री कोइराला संयुक्त राष्ट्र संघको ७० औँ महासभामा भाग लिन संयुक्त राज्य अमेरिका जानु एक दिनअघि भएको उक्त भेटमा राष्ट्रपति यादवले तराई–मधेसमा आन्दोलनरत पक्षसँग तत्काल संवाद थाल्न आग्रह गर्नुभएको थियो ।
राष्ट्रपति यादवले तत्काल राजनीतिक र प्रशासनिक पक्षबाट पहल गरी आन्दोलनरत पक्षसँग वार्ता गर्न र समस्या समाधान गर्न आग्रह गर्नुभएको सल्लाहकार दाहालले बताउनुभयो । सो भेटमा प्रधानमन्त्री कोइरालाले आन्दोलनरत पक्षसँग संवादको थालनी भइसकेको जानकारी गराउनु भएको थियो ।
