काठमाण्डौ, ६ भदौ ।
मधेसी मोर्चाका कार्यकर्ताले नेपाली कांग्रेसका सभासद राजेन्द्रबहादुर अमात्यको घरमा तोडफोड गरेका छन् ।
वीरगन्जको माइस्थानस्थित अमात्यको घरमा दिउँसो साढे १२ बजे प्रदर्शनकारीले तोडफोड गरेका हुन् । प्रदर्शनकारीले प्रहरीको गाडीमा पनि पेट्रोल बम प्रहार गरेका छन् ।
पेट्रोल बम प्रहारबाट प्रहरीहरु कृष्ण बहादुर नेपाली, राजु परियार र राजकिशोर यादव घाइते भएका छन् । उनीहरुलाई उपचारको लागि नारायणी उपक्षेत्रीय अस्पतालमा लगिएको छ ।
वीरगन्जमा स्थानीय प्रशासनले २३ दिनदेखि लगाउदै आएको कर्फ्यु मंगलबार भने दिनभरका लागि हटाएको छ । बिहान बसेको जिल्ला सुरक्षा समितिको बैठकले बिहान ६ बजेदेखि राति १० बजे सम्मका लागि कर्फ्यु हटाउने निर्णय गरेको हो ।
बिहान ६ बजेदेखि १६ घण्टाका लागि कर्फ्यु हटाइएको र राति १० बजे पछि भने फेरि कर्फ्यु जारी रहने पर्साका सहायक प्रमुख जिल्ला अधिकारी अनुज भण्डारीले जानकारी दिनुभयो ।
कर्फ्यु हटाइएको भएपनि वीरगन्जमा घोषित दंगाग्रस्त क्षेत्र भने कायम नै रहेको जिल्ला प्रशासन कार्यालयले जनाएको छ । कर्फ्यु हटाइएको भएपनि मधेसी मोर्चाकोे प्रदर्शनका कारण वीरगन्ज बिहानैदेखि तनावपूर्ण बनेको छ ।
