काठमाडौ, ५ असोज ।
एकीकृत नेकपा माओवादीका नेता एवम् सभासद् जनार्दन शर्माले नेपाली जनताको भावना र हितको पक्षमा नयाँ संविधान घोषणा भएकाले यसको विरुद्धमा कसैले पनि देशमा नाकाबन्दी र ताल्चा लगाउन नसक्ने बताउनु भएको छ ।
क्रान्तिकारी पत्रकार संघ कास्कीले आज बिहान पोखरामा आयोजना गरेको पत्रकार भेटघाट कार्यक्रममा उहाले सो कुरा बताउनु भएको हो ।
दलहरुले देशको हितविरुद्ध र मानवअधिकार हनन हुने खालका काम नगरेको भन्दै नेता शर्माले नेपाली जनताले स्वतन्त्रपूर्वक गरेको निर्णयमा कुनै पनि बाह्य शक्तिको हस्तक्षेप स्वीकार्य नहुने धारणा राख्नुभयो ।
नयाँ संविधानमा उल्लेख भएका धाराको व्याख्याले असन्तुष्ट मधेसी र जनजाति पनि समझदारीमा आउन सक्ने विश्वास व्यक्त गर्नु हुदै उहाँले आन्दोलनरत पक्षलाई वार्तामा बसेर समस्याको समाधान खोज्नुपर्नेमा जोड दिनुभयो ।
नेता शर्माले पछिल्ला समय नेपाली युवामा राष्ट्रवादी भावना बढ्दै गएकोमा खुसी व्यक्त गर्नुभयो ।
