भक्तपुर असोज ३ ।
नेपाल मजदुर किसान पार्टीका अध्यक्ष नारायणमान विजुक्छेंले संविधान जारीसँगै जटिलताहरुको सामना गर्न अझै २\४ वर्ष लाग्ने बताउनु भएको छ ।
कमल विनायकस्थित आफ्नो निवासमा नेपालको संविधान २०७२ जारी पश्चात सम्भावित जटिलताका विषयमा सञ्चारकर्मीहरुसँग कुरा गर्दै विजुक्छेंले संविधान जारी अघि नै राजनीतिक दलहरुले देशमा संघियताको विषय बुझाउन नसकेकाले यसको कार्यान्वयनमा झन्डै २\४ वर्ष लाग्ने बताउनु भयो ।
उहाँले दुई छिमेकी मध्ये उत्तरले संविधान जारीलाई सकारात्मक रुपमा लिएता पनि दक्षिणले आफ्नो हितानुकुल पाउन नसक्दा मौन रहेको बताउनु भयो ।
विगत देखिनै दक्षिणको प्रभावमा झेलिएका शिर्ष नेताहरुले संविधान जारी अघि खेलेको भूमिकाकै कारण देशले संविधान पाएको भन्दै अध्यक्ष विजुक्छेंले भन्नु भयो कानुनी राज्यको सुरुवात र राजनीतिक संक्रमणको अन्त्य भए तापनि कार्यान्वयनमा धेरै जटिलताको सामना गर्नु पर्र्ने छ ।
तराई क्षेत्रमा भएको आन्दोलनलाई भारतको सहयोग रहेको र भारतिय दवाबको शिर्ष नेताहरुले सामना गर्नु परेको भन्दै उहाँले नेताहरुले आफ्नो विबेकलाई फराकिलो पारेका र अवका दिनमा काम गर्न नसके देशले विभिन्न खालका अवस्था भोग्नु पर्ने छ ।
उहाँले नेपाली नागरिक माझ संविधान जारीसँगै विभिन्न खालका समस्या समाधान हुने र विकास निर्माण र रोजगारीको अवस्था श्रृजना हुने खालका भनाईहरुमा सत्यता नभएको भन्दै यो संविधानले पनि काम गर्ने वर्गलाई समेट्न नसकेको बताउनु भयो ।
अध्यक्ष विजुक्छेंले संविधानमा देश र नेपालीका हितका विषय समेट्न नसकिएको बताउनु भएको हो । उहाँले राम्रा र देशको हितका विषय समेत हुन्छ र हुन्नमै सिमित बनेको बताउनु भयो ।
