काठमाडौ ४ असोज ।
आज अन्तर्राष्ट्रिय शान्ति दिवस । शान्तिका लागि सहकार्यः सबैका लागि सम्मान भन्ने नाराका साथ विश्वभर विविध कार्यक्रमको आयोजना गरि मनाइदैछ ।
संयुक्त राष्ट्रसंघको आह्वानमा प्रतयेक वर्ष सेप्टेम्बर २१ तारिखमा यो दिवस मनाउने गरिन्छ । नेपालले वि. सं. २०६५ सालदेखि यो दिवस मनाउन थालेको हो ।
राष्ट्रसंघको ५६ औँ वार्षिक साधारण सभाले विश्वव्यापी रुपमा हिंसा र युद्धको समाप्तिको दिनको रुपमा आजको दिनलाई अन्तर्राष्ट्रिय शान्ति दिवसको रुपमा मनाउने घोषणा गरेको हो ।
हिजो संविधानसभाबाट शान्तिपूर्ण तरिकाले नेपालको संविधान २०७२ जारी भएकाले शान्ति दिवसलाई अझ महत्वका साथ हेरिएको छ ।
दिवसका अवसरमा प्रधानमन्त्री सुशील कोइरालाले लोकतान्त्रिक शासन पद्धति, दिगो शान्ति, समृद्धि र उत्तरोत्तर प्रगतिको कामना गर्नु भएको छ ।
उहाँले एक दशक लामो सशस्त्र द्वन्द्वलाई शान्तिमा रुपान्तण गरी शान्ति सम्झौताले निर्देश गरेबमोजिम संविधानसभाबाट संविधान जारी गर्न सकेकोमा खुशी व्यक्त गर्नुभएको छ ।
