काठमाडौ ३ असोज । एएफसी अन्डर १६ छनोटको अन्तिम खेलमा नेपालले आज ओमनसँग प्रतिस्पर्धा गर्दैछ ।
खेल नेपाली समय अनुसार अपरान्न पौने ३ बजे डोलेन ओमरजाकोभ रंगाशालामा हुनेछ ।
पहिलो दुई खेल जितेर ६ अंकसहित समुहको शीर्ष स्थानमा रहेको नेपालले ओमन विरुद्ध कम्तीमा बराबरी मात्र गरेपनि अघिल्लो चरण प्रवेश गर्नेछ ।
जोडर्न र आयोजक किर्गिस्तान जस्तो बलियो प्रतिद्धन्द्धीलाई पराजित गरेर उच्च मनोबलमा रहेको नेपाली टोलीले आफ्नो साविक रणनिति अनुसार खेल्दै जीत हात पार्ने लक्ष्य लिएको प्रशिक्षक उपेन्द्रमान सिंहले बताए ।
आजको खेलमा यदि नेपाल एक गोल अन्तरले मात्र पराजित भएमा र जोर्डनले किर्गिस्तानलाई ३ गोल भन्दा कम अन्तरमा हराएमा पनि गोल अन्तरका आधारमा नेपाल समुह विजेता बन्नेछ ।
नेपालले पहिलो खेलमा जोडर्नलाई २-१ ले स्तब्ध पारेको थियो भने आयोजक किर्गिस्तानलाई ४-२ ले पाखा लगाएको थियो । नेपाली टोलीमा रेजिन सुब्बा, दिनेश योेन्जन, मनिष कार्की लगायतका खेलाडीले खेलमा प्रभाव पार्न सक्नेछन् ।
आजै साँझ आयोजक किर्गिस्तान र जोडर्नबीच पनि खेल हुनेछ ।
