काठमाडौँ, २ असोज ।
संयुक्त ट्रेड युनियन समन्वय केन्द्र जेटियुसिसीले नेपालको संविधान, २०७२ प्रमाणीकरण भएकामा स्वागत गर्दै यसबाट नेपाली जनताले ६५ वर्षदेखि देखेको सपना पूरा भएको जनाएको छ ।
राजनीतिमा भएको ऐतिहासिक प्रगतिप्रति जेटियुसिसीले २० लाखभन्दा बढी श्रमिक हर्षित भएको भन्दै यसबाट राजनीतिक संक्रमणकाल अन्त्य, हालसम्मको आन्दोलन र संघर्षबाट प्राप्त उपलब्धि संस्थागत हुने विश्वास व्यक्त गरेको छ ।
जेटियुसिसीका अध्यक्ष विष्णु रिमालद्वारा आज जारी विज्ञप्तिमा संविधानले कुनै न कुनै रुपमा सबै तह र तप्काका जनताको आकांक्षालाई समेटेको भन्दै संविधान आजसम्मकै प्रगतिशील हुन पुगेको उल्लेख छ ।
कुनै पनि संविधान शतप्रतिशत पूर्ण नहुने भएकाले समयक्रममा सुधार हुने अपेक्षा जेटियुसिसीले गरेको छ । संविधान जारी हुने दिन आइतबार साँझ दीपावली गर्न र सोमबार विजय उत्सवमा भाग लिन जेटियुसिसीले सबैमा आग्रह गरेको छ ।
