काठमाडौ २ असोज । भारतीय प्रधानमन्त्रीका बिशेष दुतका रुपमा हिजो काठमाडौ आइपुग्नु भएका विदेश सचिव यस जयशंकरले नेपालमा संबिधान जारी गर्दा सबै क्षेत्रमा उत्सबको माहौल बन्न नसकेको भन्दै यसले भबिष्यमा संकट ल्याउन सक्ने बताउनु भएको छ ।
आज बिहान स्वदेश फर्किने क्रममा त्रिभुवन बिमानस्थलमा संचारकर्मीलाई संक्षिप्त प्रतिक्रया दिदै विदेश सचिव जयशंकरले असन्तुष्ट मधेसी दलहरुलाई बाहिर राखेर संविधान जारी गर्दा भोलीका दिनमा आउन सक्ने कठिनाईवारे सोच्न नेपालका राजनीतिक दलहरुलाई आग्रह गरिएको बताउनुभयो ।
भारतले सदैव नेपालको सम्बृद्धि र बिकास होस भन्ने चाहना राखेको भन्दै उहाँले भविष्यमा कुनै समस्या नआउनेतर्फ चासो राखेको प्रतिक्रिया दिनुभयो । उहाँ आजै स्वदेश फर्किनु भएको छ ।
काठमाण्डौ बसाईका क्रममा उहाँले राष्ट्रपति डा रामवरण यादव, प्रधानमन्त्री सुशिल कोइराला, प्रमुख ३ दलका शिर्ष नेता तथा मधेसी मोर्चाका नेतासँग छुट्टाछुट्टै भेटवार्ता गर्नुभएको थियो ।
भेटमा उहाँले मधेसमा जारी आन्दोलनले आफ्नो मुलुकमा समेत असर पार्ने भन्दै मधेस केन्द्रित दललाई पनि समेटेर अघि बढन दवाव दिनुभएको थियो ।
