काठमाडौं, २ असोज ।
संविधानसभा सचिवालयले भोली हुने संविधान घोषणा समारोहलाई भव्य बनाउन आवश्यक तयारी थालेको छ ।
भोली साँझ ५ बजे एक समारोहकाबीच राष्ट्रपति डा. रामवरण यादवले नयाँ संविधान घोषणा गर्दै हुनुहुन्छ । संविधानसभामा रहेका ५ सय ९८ सभासदमध्ये ५ सय ३७ सभासदको हस्ताक्षर सहित संविधान प्रमाणिकरण भएको छ ।
कार्यक्रममा आमन्त्रण गरिएका सबै अतिथि, विशिष्ट अतिथि र नेपालस्थित कूटनीतिक निकायका प्रमुखलाई निमन्त्रणा पठाइसकेको सचिवालयका सहायक प्रवक्ता सुदर्शन कुइँकेलले जानकारी दिनुभयो ।
राष्ट्रपति डा. यादवले संविधान जारी भएको घोषणा गरेपछि सभाध्यक्ष नेम्वाङले संविधान निर्माणमा सहयोग गर्ने सबैलाई धन्यवाद दिने कार्यक्रम छ ।
समारोहमा राष्ट्रपतिको कुनै पनि सम्बोधन नभएपनि नियमावलीअनुसार नै तोकिएको भाषामा राष्ट्रपतिले संविधान जारी भएको घोषणा गर्नुहुने सचिवालयले जनाएको छ ।
राष्ट्रपतिले संविधान सार्वजनिक गर्नुभएपछि नेपालको अन्तरिम संविधान २०६३ स्वतः खारेज हुन्छ भने त्यतिखेरदेखि नै नयाँ संविधान लागु हुनेछ ।
