काठमाडौ १ असोज ।
नेपालमा नयाँ संविधान जारी गर्ने तयारी भैरहेकाबेला भारतीय विदेश सचिव एस जयशंकर नेपा आउनुभएको छ । उहाँ भारतीय प्रधानमन्त्री नरेन्द्र मोदीका विशेष दूतका रुपमा काठमाडौं आज विहान काठमाडौं आइपुग्नु भएको हो ।
नेपालमा उहाले उच्चस्तरीय राजनीतिक नेतृत्व राष्ट्रपति, प्रधानमन्त्री र प्रमुख दलका नेताहरुसँग भेटवार्ता गर्ने कार्यक्रम छ ।
जयशंकरले अहिले केहिबेरमा प्रधानमन्त्री सुशील कोइरालालाई भेट्ने र दिउँसो दुई बजे राष्ट्रपति डा. रामवरण यादवलाई भेट्ने कार्यक्रम रहेको परराष्ट्र मन्त्रालयले जनाएको छ ।
स्रोतका अनुसार एमाले अध्यक्ष केपी ओली र एकिकृत नेकपा माओवादीका अध्यक्ष पुष्पकमल दाहाल तथा आन्दोलनरत केही मधेसवादी दलका नेताहरुसँग पनि भेट गर्ने बताइएको छ ।
यसअघि भारतीय राजदुत रन्जीत रायले नेपालको राजनीतिक घटनाक्रमबारे दिल्ली मै पुगेर भारत सरकारलाई ब्रिफिङ गर्नु भएको थियो ।
भारतसँग निकट सम्बन्ध रहेका भनिएका केही मधेसवादी दलहरु नयाँ संविधानप्रति असन्तुष्टि जनाउँदै आन्दोलनमा होमिएका बेला भारत सरकारका विशेष दूतका रुपमा विदेश सचिव जयशंकरको भ्रमणलाई चासोका साथ हेरिएको छ । जयशंकर शनिबार स्वदेश फर्किने बताइएको छ ।
