काठमाडौ १ असोज ।
भारतीय प्रधानमन्त्री नरेन्द्र मोदीका विशेष दूतका रुपमा भारतीय विदेश सचिव एस जयशंकर आज नेपाल आउँदै हुनुहुन्छ ।
नेपालमा नयाँ संविधान जारी गर्ने तयारी भइरहेका बेला भारत सरकारले आफ्नो विशेष दूत पठाएको हो ।
भारतीय विदेश सचिव जयशंकरले आजै राष्ट्रपति डा. रामवरण यादव, प्रधानमन्त्री सुशील कोइराला, सेना प्रमुख राजेन्द्र क्षेत्री लगायतसँग छुट्टाछुट्टै भेट गर्ने कार्यक्रम रहेको छ ।
स्रोतका अनुसार उहाँले एमाले अध्यक्ष केपी ओली र एकिकृत नेकपा माओवादीका अध्यक्ष पुष्पकमल दाहाल तथा आन्दोलनरत केही मधेसवादी दलका नेताहरुसँग पनि भेट गर्ने बताइएको छ ।
यसअघि भारतीय राजदुत रन्जीत रेले नेपालको राजनीतिक घटनाक्रमबारे दिल्ली मै पुगेर भारत सरकारलाई ब्रिफिङ गर्नु भएको थियो । राजदुत रे पनि आजै नेपाल आउनु हुनेछ ।
भारतसँग निकट सम्बन्ध रहेका भनिएका केही मधेसवादी दलहरु नयाँ संविधानप्रति असन्तुष्टि जनाउँदै आन्दोलनमा होमिएका बेला भारत सरकारका विशेष दूतका रुपमा विदेश सचिव जयशंकरको भ्रमणलाई चासोका साथ हेरिएको छ ।
