काठमाडौँ, ३१ भदौ ।
संयुक्त लोकतान्त्रिक मधेसी मोर्चाले संविधान घोषणा भएको दिन असोज ३ गतेलाई कालो दिनका रुपमा मनाउने निर्णय गरेको छ ।
आज बसेको मोर्चाको संयुक्त बैठकले थप आन्दोलनका कार्यक्रम सार्बजनिक गर्दै प्रमुख राजनीतिक दलसँग छलफल गर्न वार्ताको ढोका खुल्ला राख्ने निर्णय गरेको हो ।
मोर्चाले असोज ३ गते कालो झण्डा गाड्ने ,बेलुका ७ बजेदेखी ८ बजेसम्म ब्ल्याक आउट गर्ने निर्णय गरेको छ ।
असोज ४ गते जिल्ला सदुरमुकानमा संबिधान जलाउने निर्णय गरेको बैठकपछि जारी गरीएको बिज्ञप्तीमा उल्लेख गरीएको छ । मोर्चामा आबद्ध चार मधेस केन्द्रित राजनीतिक दलले विज्ञप्ति जारी गर्दै सरकार भने वार्ताद्वारा समस्याको समाधान खोज्न गम्भीर नभएको आरोप लगाएका छन ।
उनीहरुले जारी आन्दोलनलाई निरन्तरता दिने उल्लेख गरेका छन । संघीय प्रदेशसहितका विषयवस्तुसँग जोडिएर भएको अहिंसात्मक एवम् शान्तिपूर्ण आन्दोलनमा सहभागी भइरहेका जनतालाई दबाउन खोजिएको भन्दै मोर्चाले आपत्ति जनाएको छ । आन्दोलनका क्रममा मारिएका व्यक्तिहरुप्रति श्रद्धाञ्जलि र शोक व्यक्त गर्दै मोर्चाले घाइतेको शीघ्र स्वास्थ्य लाभको कामना पनि गरेको छ ।
