काठमाण्डौ,३१ भदौ ।
खोटाङको दिक्तेल नगरपालिकामा खानेपानीको समस्या झनै जटिल बन्दै गएको छ । पर्याप्त मुहान नहुनु, समय–समयमा मुहान सरसफाइमा ध्यान नदिनु र उचित व्यवस्थापन नहुदा समस्या जटिल बन्दै गएको हो ।
कहिले धारामा पानी नै नआउने त आइहाले पनि फोहर तथा दूषित पानी आउने गरेको उपभोक्ताको भनाइ छ । बढ्दो सहरीकरण तथा जनसंख्याको चापले दिक्तेल नगरपालिकाको लागि खानेपानी व्यवस्थापनमा चुनौती थपिएको हो ।
नगरपालिकामा खानेपानीको व्यवस्थापन गर्ने जिम्मा पाएको उपभोक्ता समितिले उपभोक्ताबाट उल्टै चर्को शुल्क लिने गरेको गुनासो पनि आउने गरेको छ । निक्कै महत्वकासाथ हेरिएको खानेपानी योजना ‘दिक्तेल बजार सुधार विस्तार खानेपानी योजना’ हाल अलपत्र अवस्थामा छ ।
पटकपटकको मुहान विवादका कारण योजना सम्पन्न गर्न नसकिएको निर्माण उपभोक्ता समितिका अध्यक्ष जयप्रसाद आचार्यले बताउनुभयो ।
