काठमाडौ ३० भदौ ।
आज हरितालीका तिज । नेपाली हिन्दु नारीहरुले देवाधिदेव महादेवको पूजा अर्चना र व्रत बसि हर्षोल्लासका साथ मनाउँदै छन् ।
हिमालयकी छोरी पार्वतीले महादेव पति पाउनका लागि कठोर ब्रत गरी आफ्नो कामना पूरा गरेको धार्मिक कथनअनुसार यो पर्व मनाइँदै आएको मानिन्छ ।
आज महिलाहरू सबेरै स्नान गरी शुद्ध वस्त्र पहिरेर शिव मन्दिरहरुमा गई शिव–पार्वतीको पूर्जाअर्चना गर्ने चलन छ । तीज अवधिभर महिलाहरू सौभाग्यको प्रतिक रातो पहिरनमा सजिन्छन् ।
यस पर्वमा पानीसमेत नखाई विवाहित महिलाहरु शिवको पूजा(आराधना गर्दै आफ्ना पतिको दिर्घायुको कामना गरी ब्रत बस्दछन् भने अविवाहित महिलाहरु सुयोग्य तथा आदर्श पति प्राप्त गर्ने कामनाका साथ ब्रत बस्ने गर्दछन ।
यस दिन जलसमेत नखाई ब्रत बस्नुपर्ने हुनाले अघिल्लो दिन बेलुकी नै विभिन्न परिकार तथा मिष्ठान्न तयार गरी दर खाने प्रचलन छ । तीजको अवसरमा राजधानीको पशुपतिनाथ मन्दिर सहित मुलुकभरका शिवालयहरुमा दर्शनार्थीहरुको बिहानैबाट घुइचो लागेको छ ।
आजको दिनलाई मध्यनजर गर्दै पशुपति क्षेत्रमा विशेष शुरक्षा व्यवस्था गरीएको छ । साथै दर्शन कार्यलाई सहज बनाउन विभीन्न लाईनहरु बनाई व्यवस्थीत पारीएको व्यवस्थापन समितिले जनाएको छ ।
