काठमाडौ ३० भदौ ।
जिल्ला प्रशासन कार्यालय कैलालीले तीजलाई मध्यनजर गर्दै धनगढी नगर क्षेत्रमा २२ दिनदेखि दिउँसोको समयमा लगाउँदै आएको निषेधाज्ञा आजका लागि खुला गरेको छ ।
नगरक्षेत्रमा कुनै सभा जुलुस प्रदर्शन गर्न नपाउने गरी घोषणा गरिएको निषेधित क्षेत्र भने यथावत् रहेको प्रशासन कार्यालयले जनाएको छ ।
निषेधित क्षेत्र घोषणा गरिएको भए पनि धनगढीमा आज बिहान ६ बजेदेखि साँझ ६ बजेसम्म धार्मिक कार्यक्रम भने गर्न पाइने प्रशासनद्वारा जारी विज्ञप्तिमा जानाइएको छ ।
यसैगरी जिल्लाको पूर्वीक्षेत्रको खैलाड गाविस बाहेकको टीकापुर नगरपालिका र भजनी–त्रिशक्ति नगरपालिका र आसपासका गाविस क्षेत्रमा लगाइएको निषेधाज्ञा बिहान ६ बजेदेखि अपरान्न ४ बजेसम्मका लागि हटाइएको छ ।
त्यी क्षेत्रमा घोषित दङ्गाग्रस्त क्षेत्र भने यथावत् छ । टीकापुरमा थरुहटको प्रदर्शनका क्रममा गत भदौ ७ गते भएको हिंसात्मक घटनामा एक बालक सहित आठ प्रहरी मृत्यु भएपछि स्थानीय प्रशासनले धनगढी नगर क्षेत्र र टीकापुर नगर क्षेत्रसहित आसपासका गाविसमा निषेधाज्ञा लगाउँदै आएको छ ।
