काठमाडौँ, २९ भदौ ।
एकद्वार प्रणालीबाट पाठ्यपुस्तक छाप्ने शिक्षा मन्त्रिस्तरीय निर्णय कार्यान्वयनका लागि साझा प्रकाशनले दुई नयाँ रंगीन छपाइ मेसिन प्रेस खरिद गर्ने भएको छ ।
आज राजधानीमा पत्रकार सम्मेलन गरी साझा प्रकाशनले आगामी शैक्षिक सत्रका लागि पुस्तक छाप्ने एकाधिकार प्रकाशन र जनकशिक्षा सामग्री केन्द्र लिमिटेडलाई दिइएपछि सोको तयारीका लागि प्रेस खरिद गर्ने निर्णय गरेको जनाएको हो ।
प्रकाशनका महाप्रबन्धक डोलेन्द्रप्रसाद शर्माले अर्थ मन्त्रालयसँग रु २० करोड सहुलियत ऋण माग गरेकोमा मन्त्रालय सकारात्मक देखिएपछि यन्त्र खरिद गर्न लागिएको बताउनुभयो । पहिलो चरणअन्तर्गत दसैँअघि नै प्रत्येक कक्षाका हरेक विषयका एक लाख थान पुस्तक छपाइ गरिसक्ने योजना रहेको उहाँले जानकारी दिनुभयो ।
गत साउन ३२ गते विद्यालय तहका पाठ्यपुस्तकको उत्पादन र बिक्री वितरणमा निजी क्षेत्रको अधिकार कटौती गरी पुनः सरकारी स्वामित्वका ती दुई निकायलाई जिम्मेवारी दिइएकोे थियो ।
