काठमाडौ २९ भदौ ।
आज राष्ट्रिय बाल दिवस । ‘पुनःनिर्माण र संविधान : बालअधिकारको संरक्षण हाम्रो अभियान’ भन्ने मूल नाराका साथ देशैभर विविध कार्यक्रमको आयोजना गरी मनाइदैछ ।
दिवसका अवसरमा बालबालिकाका क्षेत्रमा काम गर्ने विभिन्न सरकारी तथा गैर सरकारी संघ संस्थाले विविध कार्यक्रमको आयोजना गरेको छ ।
बालअधिकार महासन्धिलाई नेपालले अनुमोदन गरेको दिनको सम्झनामा प्रत्येक वर्ष भदौ २९ मा यो दिवस मनाउने गरिन्छ । राष्ट्रिय बाल दिवस, २०७२ मूल समारोह समितिले राजधानीमा विशेष कार्यक्रमको आयोजना गरेको छ ।
बालअधिकारको क्षेत्रमा उल्लेख्य प्रगति भएपनि शिक्षा, स्वास्थ्य लगायत क्षेत्रमा गर्नुपर्ने काम धेरै रहेको यस क्षेत्रमा कार्यरत संघसंस्थाको भनाई छ । नेपालले सन् १९९० मा बालअधिकार महासन्धीमा हस्ताक्षर गरेको थियो ।
यसैबीच दिवसको पूर्व सन्ध्यामा विभिन्न आन्दोलनमा मृत्यु हुने बालबालिकाको सम्झनामा हिजो त्रिभुवन विमानस्थल बाहिर दीप प्रज्वलन गरिएको थियो ।
महिला, बालबालिका तथा समाजकल्याण मन्त्रालय र विभिन्न गैरसरकारी सङ्घसंस्थाले आयोजनामा भएको उक्त कार्यक्रममा मन्त्री, नागरिक समाज, मानवअधिकारकर्मी, पत्रकार तथा सर्वसाधारणको सहभागिता थियो ।
सो अवसरमा महिलामन्त्री नीलम केसीले सडक बालबालिका मुक्त सहर बनाउन सडक बालबालिका व्यवस्थापन कार्य्विधि ल्याउने तयारी भइरहेको जानकारी दिनुभयो । सो अवसरमा मन्त्री केसीले केन्द्रीय बालकल्याण समितिको नयाँ भवन पनि शिलान्यास गर्नु भएको छ ।
