काठमाण्डौ,२८ भदौ ।
बैशाख १२ गतेको बिनासकारी भूकम्पपछि रसुवामा गाउँ छोडी अन्यत्र बसेका विस्थापित परिवारलाई मङ्सिरसम्म यथास्थान नछाड्न स्थानीय प्रशासनले आग्रह गरेको छ ।
पुनर्वासको खाका नआउनजेल मङ्सिरसम्म हाल बसिरहेकै स्थान नछोड्न विस्थापित सबैसँग प्रमुख जिल्ला अधिकारी शिवराम गेलालले आग्रह गर्नुभएको छ ।
भूकम्प पछि हाकु क्षेत्रका विस्थापित हुन पुगेका ७ सय ५१ घर परिवार जिल्लाको धुन्चे, धैबुङको कालीका स्थान र बेत्रावती क्षेत्रमा टहरा बनाई अस्थायी बसोबास गरिरहेको हाकु गाविसले जनाएको छ ।
एन्टोना फाउन्डेसनले आइतबार सम्पन्न गरेको टड्कारो समस्या र राहत वितरणको प्रणाली विषयक अन्तरक्र्रियामा विस्थापित परिवारले टहरोभित्रको बसाइँ असहज भएको र वर्षायाम पनि सकिन लागेकाले परिस्थिति क्रमश सहज हुन गएका कारण आवास पुनःनिर्माण गरी आफ्नो थातथलोमा बस्न जान पाउनु पर्ने धारणा राखेका थिए ।
