काठमाडौँ, २८ भदौ ।
सरकारले सार्वजनिक यातायातका साधनमा भाडा घटाएर नयाँ भाडादर कायम गरेपनि यातायात व्यावसायीले लागु नगरेपछि यातायात व्यवस्था विभागले अनुगमन सुरु गरेको छ ।
पेट्रोलियम पदार्थको भाउ घटेपछि विभागले गत भदौ २५ गतेदेखि नयाँ भाडादर लागू गरेको थियो । जसअनुसार उपत्यकामा सार्वजनिक सवारी साधनको भाडा न्यूनतम रु १३ रुपैयाँ कायम गरिएको छ । तर यातायात व्यावसायीहरुले घटेको भाडादर लागु नगरेपछि विभागले अनुगमन सुरु गरेको हो ।
सरकारले घटाएको यो भाडादर वैज्ञानिक पद्धतिको भाडादर भएकाले लागू गराउन अनुगमन सुरु गरिएको विभागका निर्देशक वसन्त अधिकारीले बताउनुभयो ।
सार्वजनिक यातायातमा पटकपटक भाडासम्बन्धी समस्या देखिएपछि सरकारले २०६५ फागुन २० देखि वैज्ञानिक भाडादर लागू गरेको थियो । त्यसअघि सामान्य छलफल र आपसी सहमतिबाट भाडादर निर्धारण गर्ने चलन थियो ।
यसरी भाडादर निर्धारण गर्दा व्यापक असन्तुष्टि भएपछि सरकारले वैज्ञानिक भाडा पद्धतिको अवधारणा अघि सारेको हो ।
भाडादर लागू नगर्नेलाई कारबाहीको दायरमा ल्याउन विभागका महानिर्देशक चन्द्रमान श्रेष्ठको संयोजकत्वमा महासङ्घ, उपभोक्तावादी सङ्घ संस्था र ट्राफिक प्रहरीको सहभागितामा केन्द्रीय अनुगमन समिति गठन गरी हिजोबाट काम सुरु गरिएको विभागले जनाएको छ ।
