खोटाङ, २७ भदौ ।
जिल्लामा सञ्चालित विकासे योजना तोकिएकै मितिमा सम्पन्न गराउने उद्देश्यले दबाब समूह गठन गरिएको छ । जिल्लामा सञ्चालित विकासे योजनाका ठेकेदार तथा उपभोक्ता समितिले तोकिएको मितिमा योजना सम्पन्न नगरेपछि स्थानीय शान्ति समितिका संयोजकको नेतृत्वमा दबाब समूह गठन गरिएको हो ।
जिल्लास्थित सम्पूर्ण राजनीतिक दल, नागरिक समाज, उद्योग वाणिज्य सङ्घ, नेपाल पत्रकार महासङ्घ र गैरसरकारी संस्था महासङ्घ समूहको सदस्य रहेका छन् । समूहले जिल्लास्थित सम्पूर्ण विकास निर्माणका योजना अनुगमन गर्ने र समयमा गुणस्तरीय योजना सम्पन्न गराउन पहल गर्ने जनाएको छ ।
समूहको आइतबार बस्ने पहिलो बैठकबाट कार्ययोजना तयार बनाएर अगाडि कारबाही थालिने समूहका संयोजक तथा स्थानीय शान्ति समितिका संयोजक सूर्यबहादुर राईले जानकारी दिनुभयो । उद्योग वाणिज्य सङ्घ खोटाङले आयोजना गरेको ‘छिटो र गुणस्तरीय विकासमा सरोकारवाला निकायको भूमिका’ विषयक अन्तक्र्रियापछि दबाब समूह गठन गरिएको हो ।
कार्यक्रममा जिल्लामा सञ्चालित योजनाका ठेकेदार तथा उपभोक्ता समितिले तोकिएकै मितिमा आफूहरुले जिम्मा लिएको योजनाका काम सम्पन्न गर्ने प्रतिबद्धता जनाएका छन् । जिल्लामा निर्माणाधीन सडक, पुल तथा अन्य विकासे योजनाका ठेकेदार तथा उपभोक्ता समितिले यस्तो प्रतिबद्धता जनाएका हुन् ।
जिल्लामा सञ्चालित योजनाका ठेकेदार तथा उपभोक्ता समितिले आफ्नो जिम्मेवारीप्रति हेलचेक्र्याईं गरेकाले सरोकारवालासँग छलफल गरिएको वाणिज्य सङ्घका अध्यक्ष राजेन्द्र लयालुले बताउनुभयो । “ठेकेदार र उपभोक्ता समितिको लापरबाहीले सडक तथा पुल निर्माण नहुँदा व्यापार÷व्यवसायमा बाधा पुगेको छ ।” उहाँले भन्नुभयो – “त्यसैले उनीहरुलाई चाँडोभन्दा चाँडो काम सक्न दबाब दिने उद्देश्यले छलफलको आयोजना गरिएको हो ।” रासस
