काठमाडौ २७ भदौ ।
आज भाद्र कृष्ण औंशी अर्थात कुशे औंशी । पितृ तथा गोकर्ण औंसीबाट प्रसिद्ध यस दिनलाई बाबुको मूख हेर्ने दिनका रुपमा पनि मनाइछ ।
आजका दिन छोराछोरीले बाबुलाई मन पर्ने फलफूल, मिठाइ तथा भोजन गराई सम्मान गर्ने गरिन्छ । बाबु नहुनेले विभिन्न तीर्थ स्थलमा गई तर्पण तथा श्राद्ध गर्ने चलन छ ।
यसैबीच राजधानीको गोकर्ण स्थित गोकर्णेश्वर महादेवमा दिवंगत बाबुको नाममा तर्पण तथा सिदादान गर्नेको बिहानैबाट घुँइचो लागेको छ ।
यस्तै आज देव तथा पितृकार्यमा प्रयोग गरिने पवित्र कुश घर घरमा भित्र्याउँदै कुशे औसी मनाइँदै छ । हिन्दुधर्मावलम्बीले हरेक वर्ष भाद्र कृष्ण औंसीका दिन ब्राह्मणद्वारा विधिपूर्वक कुश काट्ने गरिन्छ ।
यस दिन काटिएको कुशलाई घरमै राख्ने र जजमानकोमा लगिदिने प्रचलन रहेको छ । कुश घरमा राख्नाले परिवारको कल्याण हुने, सुख शान्ति मिल्ने धार्मिक विश्वास रहिआएको छ ।
