पाँचथर, २४ भदौ ।
लिम्बूवान संयुक्त सङ्घर्ष समितिले लिम्बूवान स्वायत्त राज्यको माग गर्दै आज अरुण पूर्वका नौ जिल्लामा आमहड्तालको आह्वान गरेको छ ।
बिहानैबाट पूर्वका पाँचथर, इलाम, ताप्लेजुङ, झापा, मोरङ, सुनसरी, तेह्रथुम, धनकुटा, सङ्खुवासभा, भोजपुर लगायत जिल्लाको जनजीवन प्रभावित भएको छ ।
पूर्वका नौ जिल्ला ऐतिहासिक पृष्ठभूमिका आधारमा लिम्बूवान स्वायत्त राज्य लेखिनुपर्ने, धर्म्निरपेक्ष राज्य, समानुपातिक निर्वाचन प्रणाली, बहुभाषिक नीति, आइएलो १६९, युएन् ड्रिपलाई संस्थागत गर्न माग गर्दै बन्दको आह्वान गरिएको समितिले जनाएको हो ।
यी जिल्लामा चल्ने लामो तथा छोटो दूरीका सवारीका साधन सञ्चालन हुन सकेका छैनन् भने बजार, पसल, कलकारखाना, शिक्षण संस्थासमेत ठप्प छन् ।
मोटरसाइकलसमेत सञ्चालन हुन नदिने लिम्बूवान संयुक्त सङ्घर्ष समितिले जनाएको छ ।
बन्द सफल पार्न बिहानैदेखि बन्दकर्ता चोकचोकमा बजार पसल बन्द गराउँदै हिँडेका छन् । समितिले आज र भोलि आमहड्तालको आह्वान गरेको हो ।
