गौशाला, २३ भदौ । आन्दोलनकारीले मङ्गलबार अबेर साँझ महोत्तरी जिल्ला शिक्षा कार्यालयमा तोडफोड र आगजनी गरेका छन् ।
विगत २६ दिनदेखि अनिश्चितकालीन मधेस बन्द गरेर आन्दोलनमा उत्रेका संयुुक्त लोकतान्त्रिक मधेसी मोर्चाका कार्यकर्ताले हिजो मङ्गलबार साँझ जिल्ला सदरमुकाम जलेश्वर नगरपालिकाको वडा नम्बर ५ मा अवस्थित जिल्ला शिक्षा कार्यालयमा पुगी तोडफोड र आगजनी गरेका हुन् ।
पचासभन्दा बढीको सङ्ख्यामा गएका मोर्चाका कार्यकर्ताले तालाबन्दी रहेको सो कार्यालयको बाहिरबाट सम्पूर्ण झ्याल फुटाएर पर्दा र कागजात राखिएको बोरामा आगजनी गरेका थिए ।
आगजनीको खबर थाहा पाएर तत्काल घटनास्थल पुगेका नेपाल र सशस्त्र प्रहरीका संयुक्त टोलीले आगजनी नियन्त्रणमा लिएका थिए । प्रहरीले आगो नियन्त्रणमा लिए पनि तोडफोड र आगजनीबाट सो कार्यालय केही हदसम्म क्षतिग्रस्त भएको छ ।
महोत्तरीको अवस्था अस्तव्यस्त
विगत २६ दिनदेखि महोत्तरीमा जारी अनिश्चितकालीन मधेस बन्दका कारण जिल्लाको अवस्था अस्तव्यस्त बनेको छ ।
लामो समयदेखिको बन्दका कारण जिल्लावासीमा दैनिक समस्या बढ्दै गएको छ भने दैनिक उपभोगका खाद्यवस्तु, पेट्रोलियम पदार्थ र औषधि अभावसमेत सिर्जना भएको छ ।
लगातार २६ दिनदेखि जिल्लामा छोटो तथा लामो दूरीका सवारीसाधन पूर्णरुपमा ठप्प रहेको छ भने जिल्लाका हाटबजार, कलकारखाना, उद्योगधन्दा, बैंक तथा वित्तीय संस्था, शैक्षिक संस्था, सरकारी तथा गैरसरकारी कार्यालय सबै प्रभावित भएका छन् ।
इतिहासकै सबभन्दा लामो बन्दका कारण जिल्लामा खाद्यसङ्कट उत्पन्न हुन थालेको छ भने जिल्लावासीको दिनचर्या कष्टपूर्ण भएको छ ।
यस बन्दबाट जिल्लाका सबै वर्ग प्रभावित भएका छन् तर बन्दको मारमा सबैभन्दा बढी दैनिक रोजगारी गरेर जीवनयापन गर्ने मजदुर परेका छन् । उनीहरुले कति दिनदेखि पेटभरि खान नपाएको गुनासोसमेत गरेका छन् ।
यता जिल्लाका सहर बजारमा बस्नेले बजार खुल्ला नभएका कारण पैसा भएर पनि आवश्यक वस्तु खरिद गर्न नसक्दा विभिन्न समस्या उत्पन्न भएको बताएका छन् ।
त्यस्तै, बिरामी पनि बन्दको प्रत्यक्ष मारमा परेका छन् । बिरामीहरु बन्दका कारण जिल्लाका अस्पताल तथा जिल्ला बाहिर विशेष उपचारका लागि समेत जान पाएका छैनन् । यसको अलावा जिल्लामा औषधि अभावसमेत सिर्जना भएको चिकित्सकले बताएका छन् ।
बन्दका कारण जिल्ला बाहिरबाट आवश्यक औषधि आउन सकेको छैन भने बन्दकर्ताले एम्बुलेन्स पनि तोडफोड गर्न थालेपछि आकस्मिक उपचारका लागि बिरामीलाई बाहिर पनि पठाउन नसकिएको चिकित्सक बताउँछन् ।
