काठमाडौ २० भदौ ।
चिकित्सा शिक्षा सम्बन्धी माथेमा कार्यदलको प्रतिवेदन कार्यान्वयन सहितको माग राख्दै अनशनरत डा. गोबिन्द केसीले आज अपरान्नबाट अनशन तोडदै हुनुहुन्छ ।
डा. केसीको माग सम्बोधनका विषयमा सरकार र डा. केसीका प्रतिनिधिबीच गएराति ११ बुँदे सहमति भएपछि आज अपरान्न ३ बजेबाट अनशन तोड्न लाग्नु भएको हो ।
मुख्य सचिव सोमलाल सुवेदी, राष्ट्रिय योजना आयोगका उपाध्यक्ष डा. गोविन्द पोख्रेल लगायत सरकारी पक्ष र डा. केसी पक्षबीच माथेमा प्रतिवेदनको सुझाव अनुसार मन्त्रिपरिषदको पहिलो बैठकबाट चिकित्सा शिक्षा आयोग गठन गर्ने सहमति भएको छ ।
चिकित्सा शिक्षा नीतिसम्बन्धी गरिएका निर्णयको सहजीकरण र अनुगमन पनि उक्त आयोगले गर्नेछ ।
चिकित्सा शिक्षा सम्बन्धी नीति तयार पारी मस्यौदा बनाएर तीन महिना भित्र संसदमा पेश गर्ने सहमति पत्रमा उल्लेख गरिएको छ । द्धिपक्षीय सहमतिपछि आन्दोलनरत चिकित्सकहरु पनि आजबाट काममा फर्किने भएका छन् ।
