काठमाडौ १९ भदौ ।
आज भाद्र कृष्णाष्टमी, अर्थात् श्री कृष्ण जन्माष्टमी । भगवान कृष्णको पुजा आरधना गरि मनाइदैछ । आजका दिन भक्तजनहरु कृष्ण मन्दिरहरूमा गई श्रीकृष्णको पूजा आराधना, व्रत र भजनकीर्तन गर्ने गर्दछन्
द्वापरयुगको अन्त्यतिर भाद्रकृष्ण अष्टमीको मध्यरातमा कृष्णको जन्म भएको सम्झनामा यो पर्व मनाउने गरिएको जनविश्वास रहिआएको छ । आजको दिन महिलाहरू व्रत बसी राति कृष्ण जन्मिएको सम्झनामा पूजाआजा गर्ने र रातभर जाग्राम बसेर नाचगान तथा कृष्णको भक्ति संगीत गाउँछन् ।
यसो गरेमा श्रीकृष्ण प्रसन्न भई मनोवाञ्छित फल प्राप्त हुने धार्मिक विश्वास छ । भगवान कृष्णलाई भगवान विष्णुको आठौं अवतारका रुपमा लिने गरिन्छ । बाल्यकालदेखि नै विचित्रलीला देखाएका कृष्णले गोपिनी र राधासँग गरेको प्रेमप्रसंगका कारण यो महिना प्रेमोत्सव अर्थात् झुलनोत्सवका रुपमा पनि मनाउने गरिन्छ ।
आजका दिन ललितपुर पाटनस्थित श्रीकृष्ण मन्दिर, काठमाडौं गोठाटारमा रहेको नवतनधाम लगायत देशभरका कृष्ण मन्दिरमा बिहानैबाट दर्शनार्थीको भिड लागेको छ ।
यद्यपी भूकम्पका कारण मन्दिर जोखिमपूर्ण भएकाले यस पटक ललितपूरको कृष्ण मन्दिरमा भगवान् श्रीकृष्णको मूर्ति दर्शन गर्न दिइएको छैन ।
भक्तजनलाई प्रवेश गर्न नदिई भगवान् श्रीकृष्णको चाँदीको पादुका दर्शनका लागि मन्दिरसँगैको डबलीमा राखिएको गुठी संस्थान ललितपुर शाखा प्रमुख रुद्रनाथ अधिकारीले बताउनुभयो ।
जन्माष्टमीका अवसरमा राष्ट्रपति डा. रामवरण यादव कृष्ण मन्दिर गई श्रीकृष्णको दर्शन र प्रसाद ग्रहण गर्ने कार्यक्रम छ ।
