काठमाडौ १६ भदौ ।
आज २० औ तामाङ चलचित्र दिवस । तामाङ चलचित्रकर्मीहरुले विविध कार्यक्रमको आयोजना गरि मनाइदैछ ।
वि सं. २०५३ साल भदौ १६ गते पहिलो पटक जयनन्द लामाद्धारा निर्देशित सेमरी छोरङान नामक चलचित्र प्रदर्शन भएको दिनको सम्झनामा चलचित्रकर्मीहरुले हरेक वर्ष भदौ १६ लाई तामाङ चलचित्र दिवसको रुपमा मनाउदै आएको छ ।
तामाङ चलचित्रको दुई दशकको इतिहासमा करिब सय वटाको हाराहारीमा चलचित्रहरु निर्माण भएका छन् । यद्यपी तामाङ परिवेश र वास्तविक पहिचानलाई समेटिएको चलचित्र अझै निर्माण हुन नसकेको सरोकारवालाहरुको गुनासो छ ।
दिवसका अवसरमा तामाङ चलचित्र संघले आज विशेष कार्यक्रमको आयोजना गरेको छ । राजधानीको बागबजार स्थित होटल असोकामा दिउँसो एक बजे हुने कार्यक्रममा तामाङ चलचित्र क्षेत्रमा योगदान पुरयाएका स्रष्टाको सम्मान तथा चलचित्र क्षेत्रको वर्तमान अवस्थाका बारेमा अन्तरक्रिया कार्यक्रम रहेको संघले जनाएको छ ।
