काठमाडौ १३ भदौ ।
सुरक्षा संवेदनशीलतालाई मध्यनजर गर्दै कैलालीको धनगढी नगरपालिकामा लगाइएको कर्फ्यु आजबाट केही खुकुलो पारिएको छ ।
स्थानिय प्रशासनले सात दिन यता दैनिक लगाउंदै आएको कर्फ्यु आजबाट एक घण्टा घटाएको हो ।
धनगढी नगरपालिकामा बिहान साढे ११ बजेदेखि साँझ साढे ६ बजेसम्म लगाउदै आएको कर्फ्यु आजबाट साँझ ५ बजेसम्मलाई मात्र कायम राखिएको स्थानीय प्रशासनले जनाएको छ ।
उता, दंगाग्रस्त क्षेत्र घोषणा गरिएका कैलालीका टीकापुर र भजनी त्रिशक्तिनगरपालिका सहित दुर्गौली, धनसिंहपुर, पथरैया, मुनुवा, जोशीपुर, नारायणपुर, बौनिया र थापापुर गाविसमा लगाइएको कफ्र्यूलाई आजपनि कायमै छ ।
लगातारको कर्फ्युले कैलालीको जनजीवन कष्टकर बन्दै गएको छ । दंगाग्रस्त क्षेत्र घोषणा गरिएका सबै गाविसमा सेनाको उपस्थिति रहेको छ ।
सोमबारको हिंसापछि लगातार कर्फ्युका कारण दैनिक उपभोग्य बस्तुको अभाव भएपछि टीकापुरबासीको जनजीवन अत्यन्त कष्टकर बन्न थालेको छ ।
