काठमाडौं, भदौ ८ / सरकारले कैलालीको टिकापुरमा सोमबार भएको घटनाको छानबिन गर्न उच्चस्तरीय छानविन समिति बनाएको छ । आज बसेको मन्त्रीपरिषदको बैठकले राष्ट्रिय अनुसन्धान विभागका पूर्व प्रमुख देवीराम शर्माको संयोजकत्वमा ५ सदस्यीय छानबिन समिति गठन गरेको हो ।
समितिमा नेपाल प्रहरीका अतिरिक्त महानिरीक्षक प्रतापसिंह थापा, सशस्त्र प्रहरी अतिरिक्त महानिरीक्षक जीवन थापा, गृह मन्त्रालयका सहसचिव विनोद केसी र राष्ट्रिय अनुसन्धान विभागका उपनिर्देशक गणेश अधिकारी सदस्य हुनुहुन्छ ।
समितिलाई प्रतिवेदन बुझाउने समय भने तोकिएको छैन । यस्तै सोमबारको घटनामा ज्यान गुमाएका प्रहरीलाई सम्मानस्वरुप एक तह बढुवा गर्ने निर्णय पनि गरेको सरकारका प्रवक्ता तथा सूचना तथा सञ्चार मन्त्री मिनेन्द्र रिजालले जानकारी दिनुभयो । सरकारले देशभर भैरहेका घटना रोक्न नागरिकलाई आह्वान गरेको छ ।
हिंसाबाट कसैकोपनि माग पूरा हुन नसक्ने भन्दै सरकारले शान्ति स्थापनामा सहयोग गर्न सबैलाई आग्रह गरेको हो ।
