बाँके, ७ भदौ ।
तराई मानव अधिकार रक्षक संजाल थर्ड एलायन्स उप क्षेत्रीय कार्यालयले संघीयताको सीमाङ्कनलाई लिएर भइरहेका विरोध प्रदर्शन र निषेधज्ञाका नाममा अत्यधिक बल प्रयोग नगर्न आग्रह गरेको छ ।
थर्ड एलायन्स उप क्षेत्रीय कार्यालय नेपालगंजका संयोजक आलम खानले सोमबार एक विज्ञप्ति निकाल्दै अनावश्यक बल प्रयोग नगर्न प्रहरीलाई निर्देशन दिनसमेत सरकारसँग आग्रह गरेको हो
विज्ञप्तिमा प्रहरीलाई बल प्रयोग गर्नुपर्ने अवस्थाबारे अन्तराष्ट्रिय मान्यताको अनुसरण गर्न पनि आग्रह गरिएको छ ।
दलहरुले ६ प्रदेशको सीमाङ्कनमा सहमति गर्ने बित्तिकै मुलुकका विभिन्न ठाउँमा त्यसको विरोधमा प्रदर्शन सुरु भएको थियो ।
प्रदर्शनका क्रममा प्रहरीको लाठी चार्जबाट बाँकेमा ३४, बर्दियामा २४,कैलालीमा १७ जना घाईते भएका छन् । घाईतेहरुको तत्काल निःशुल्क उपचार गर्ने व्यवस्था मिलाउन पनि सरकार संग माग गरिएको छ ।
यता निषेधज्ञाका नाम प्रहरीले सर्वसाधारण नागरिक माथि टोल टोलमा प्रबेश गरी आक्रमण गर्नुका साथै नियन्त्रणमा लिई बन्दी बनाउने काम गरेको कार्यप्रति थर्ड एलायन्सले घोर निन्दा गर्दछ ।
बाँके प्रहरीले संयुक्त लोकतन्त्रीक मधेशी मोर्चाका सदस्य सचिव ललित रौनियार,राम कुमार दिक्षित सहित १० जनालाई संघीय समाजबादी फोरम नेपालको पार्टी कार्यालयबाट नियन्त्रणमा लिई बन्दी बनाएकोले तत्काल पक्राउ परेकाहरुलाई सार्वजानिक गरी रिहा गर्न स्थानीय प्रशासन संग मधेशी मोर्चाले माग गरेको छ ।
