काठमाण्डौ ,६ भदौ ।
संविधानको पहिलो विधेयक बिरोधका बिच संविधानसभामा पेश भएको छ । मधेस केन्द्रित दलको वहिस्कार तथा राप्रपा नेपालको अवरोधका विच विधेयक संविधानसभामा पेश भएको हो ।
मस्यौदा समितिका सभापति कृष्ण प्रसाद सिटौलाले ३७ भाग र ३ सय २ धाराको विधेयक पेश गर्नुभयो । विधेयक पेश गर्नुअघि सीमांकनमा जिल्ला टुक्राएको विषयमा केहि सभासदले विरोध जनाएका थिए ।
प्रस्तावित ७ प्रदेशको खाकामा रुकुम र बाग्लुङलाई टुक्राएको भन्दै धवलागिरीबाट प्रतिनिधित्व गर्ने सभासदले आपत्ति जनाएका हुन् ।
सभासद अर्जुनप्रसाद जोशी, चित्रबहादुर केसी, श्रीमाया थकाली लगायतले जिल्ला टुक्राएकोप्रति आपत्ति जनाउनुभयो ।
यस्तै मधेस र थारु बहुल क्षेत्रलाई टुक्राएर कमजोर बनाउने षड्यन्त्र भएको भन्दै यसलाई सच्याउन माग गर्दै सभासद जितेन्द्र देव, रुक्मिनी चौधरीलगायतले सिमांकनको विरोध गर्नुभयो ।
विधेयक पेश गर्दै सभापति सिटौलाले नारावाजी र अवरोधले जनताको अपेक्षा पुरा नहुने बताउँदै सबै दल मिलेर जतिसक्दो छिटो संविधान जारी गर्न आवश्यक रहेको बताउनुभयो ।
संघीयताको प्रस्तावप्रति असहमती जनाउँदै मधेसी जनाधिकार फोरम लोकतान्त्रिक, थरुहट पार्टि, राष्ट्रिय मधेस सद्भावना पार्टि र फोरम गणतान्त्रिकले आइतबारको संविधानसभा बैठक बहिस्कार गरेको बताएका छन् ।
बुधबार विहान ८ बजेदेखि प्रस्तुत विधेयक माथि सैद्धान्तिक छलफल हुने जनाइएको छ ।
