काठमाडौ ६ भदौ । सरकारले गत वैशाख १२ को विनाशकारी भूकम्पबाट प्रभावित पीडितलाई थप रकम वितरणको तयारी गरेको छ ।
रकम वितरणका लागि कार्यविधि बनाउने कार्य अन्तिम चरणमा पुगेको पुनर्निर्माण प्राधिकरणका प्रमुख कार्यकारी अधिकृत सिइओ गोविन्द पोख्रेलले जानकारी दिनुभयो ।
कार्यविधि बन्ने वित्तिकै सरकारले विभिन्न चरणमा रकम बाँड्ने तयारी गरेको उहाँको भनाई छ । पीडितले घर बनाएको आधारमा रकम वितरण गर्ने सरकारको तयारी छ ।
यसअघि सरकारले अस्थायी टहरा बनाउनको लागि १५ हजार रुपैयाँ वितरण गरेको थियो ।
भूकम्प पीडितलाई परिचयपत्रको आधारमा दुईलाख रुपैयाँ दिने सरकारले यसअघि नै घोषणा गरेपनि कतिपय पीडितले १५ हजार समेत नपाएको गुनासो गर्दै आएका छन् ।
अर्थ मन्त्रालयले भूकम्प पीडितलाई दिन ९१ अर्ब रुपैयाँ छुट्याएको जनाएपनि समन्वयको अभावमा रकम मन्त्रालय मै थन्किएको छ ।
शहरी विकास मन्त्रालयको योजनामा अर्थ मन्त्रालयले रकम निकासा गर्नुपर्ने भएपनि समन्वय अभावमा पीडितले रकम नपाएका हुन् ।
