काठमाडौ ३२ साउन ।
मोहन वैद्य नेतृत्वको नेकपा–माओवादी, आदिवासी जनजाति र मधेस केन्द्रित दलले आह्वान गरेको बन्दको दोस्रो दिन आज रत्नपार्कमा प्रदर्शनका क्रममा तीन दर्जन बढी आन्दोलनकारी पक्राउ परेका छन् ।
नेकपा माओवादीका केन्द्रीय सदस्य शुभराम यादव सहित ४० जनालाई प्रदर्शनका क्रममा रत्नपार्कबाट पक्राउ गरेको माओवादीले जनाएको छ ।
आफूहरुले शान्तिपूर्ण प्रदर्शन गरिरहेका बेला पक्राउ गरेको अखिल क्रान्तिकारीका महासचिव उत्तम अधिकारीले बताउनु भयो ।
यसअघि संघीय समाजवादी फोरमका सहअध्यक्ष राजेन्द्र श्रेष्ठ, वैद्य माओवादीका केन्द्रीय सदस्य सुरेश श्रेष्ठ लगायतलाई असनबाट पक्राउ गरेको थियो ।
यसअघि हिजोको बन्दका क्रममा ठाउँ ठाउँमा तोडफोडमा उत्रेपछि पक्राउ परेका सबै बन्दकर्ताहरुलाई भने प्रहरीले रिहाइ गरिसकेको संघिय समाजवादी फोरम नेपालका नेता आङकाजी शेर्पाले जानकारी दिनुभयो ।
