काठमाण्डौ,२४ साउन ।
पाल्पाको दोभानस्थित सिद्धबाबामा पहिरोमा परी भएको माइक्रो बस दुर्घटनामा बेपत्ता भएकाहरुको खोजी कार्य जारी छ । नेपाली सेना, सशस्त्र प्रहरी, पाल्पा र बुटवलबाट खटिएका प्राविधिकसहितको टोलीले खोजी जारी राखेको छ।
पाल्पाबाट बुटवल आउँदै गरेको लु १ ख ५७७१ नम्बरको माइक्रो बस दोभान–५ सिद्धबाबामा हिजो दिउँसो पहिरोसँगै तिनाउ नदीमा खसेको थियो । हालसम्म पाल्पा ताहुकी बिद्या श्रेष्ठ, बिष्णु माया श्रेष्ठ र गुल्मी सिर्सेनीका बिष्णुबहादुर थापाको मात्र शव फेला छ ।
दुर्घटनाग्रस्त बस नदीमा हराइरहेकाले उद्धारमा थप कठिनाई भएको प्रहरीले जनाएको छ । पानी मुनी गएर बस खोज्ने कार्य भइरहेको घटनास्थलमा उद्धारमा खटिएका पाल्पाका प्रहरी नायव निरीक्षक तोपबहादुर रानाले जानकारी दिनुभयो । बसमा सवार अन्यले भने हाम फालेर ज्यान जोगाएका थिए ।
लगातारको बर्षासँगै हिलो, लेदो र ढुंगासहितको पहिरो खसिरहेको र नदीमा बाढी आएको कारण उद्धारमा थप कठिनाई भएको हो । पहरोका कारण सडक अवरुद्ध हुँदा सयौं सबारी साधन र यात्रु अलपत्र परेका छन् । डोजर प्रयोग गरी अहिले पहिरो हटाउने कार्य भइरहेको छ ।
