काठमाडौँ ।
मनकामना दर्शन प्रालिले फेवातालको किनाराबाट पुम्दीभुम्दीको शान्तिस्तुपसम्म केवलकार निर्माणको तयारी गरे सँगै बिबाद बढ्दै गएको छ । पोखराको मुख्य पर्यटकीय क्षेत्र बैदाममा रहेको वसुन्धरापार्कमा केबलकारको मुख्य प्रस्थानबिन्दु बनाउन नहुने माग गर्दै स्थानीयवासी आन्दोलित भएका छन् ।
सो बिषयमा व्यवस्थापिका–संसद्को सार्वजनिक लेखा समितिमा समेत छलफल भएको छ । पोखरामा हरियाली बढाउने उद्देश्यका साथ अधिग्रहण गरिएको कुल १ सय ८ रोपनी जग्गामा केबलकार बनाउन लागेको भन्दै कास्कीबाट संविधानसभामा प्रतिनिधित्व गर्ने सभासद्हरुले लेखा समितिको ध्यानाकर्षण गराएका छन् ।
सभासद् तथा स्थानीयवासीले केबलकार बनाउने विषयमा ध्यानाकर्षण गराएपछि त्यसबिषयमा सत्य तथ्य बुझि निर्णय गरिने लेखा समितिका सभापति जनार्दन शर्माले बताउनु भयो ।
समितिले भौतिक पूर्वाधार तथा यातायात व्यवस्था मन्त्रालयलाई सो विषयमा प्रष्ट पारी समितिलाई जानकारी गराउन निर्देशन दिएको छ ।
समितिमा कास्कीबाट संविधानसभामा प्रतिनिधित्व गर्ने रवीन्द्र अधिकारी, यज्ञबहादुर थापा, सीता गिरी ओली र कुमार खड्कालगायतले ध्यानाकर्षण गराएका थिए ।
भौतिक पूर्वाधार मन्त्रालयले समितिमा जवाफ पठाएपछि आवश्यक निर्णय लिइने सभापति शर्माको भनाइ छ । मनकामना दर्शन प्रालिले फेवातालको किनाराबाट पुम्दीभुम्दीको शान्तिस्तुपसम्म १ दशमलव ३ किलोमिटर दूरीको केबलकार निर्माणको तयारी गरेको थियो ।
केबलकार निर्माणका लागि केही महिना अगाडि भौतिक पूर्वाधार तथा यातायात व्यवस्था मन्त्रालयले पोखरा उपत्यका नगर विकास समितिको स्वामित्वमा रहेको १०८ रोपनी क्षेत्रफलको वसुन्धरा पार्क मनकामना दर्शनलाई प्रदान गरेको थियो ।
सार्वजनिक निजी साझेदारी तथा निर्माण, सञ्चालन र हस्तान्तरण (बुट) अवधारणाअनुसार २० वर्षपछि कम्पनीले केबलकार सरकारलाई हस्तान्तरण गर्ने सर्तमा मनकामना दर्शन प्रालिले सो जग्गा प्राप्त गरेको हो । करीब रू. एक अर्ब ३० करोड लागतमा केबलकार निर्माण हुने मनकामना दर्शन प्रालिका कार्यकारी निर्देशक राजेशबाबु श्रेष्ठले जानकारी दिनुभयो ।
