काठमाडौ २२ साउन । लगातारको वर्षासँगै खसेको पहिरोका कारण मध्यपहाडी लोकमार्ग अवरुद्ध भएको छ ।
लोकमार्ग अन्तरगत सिन्धुलीको हैबारमा पहिरो खस्ने क्रम नरोकिएपछि यातायात सेवा अबरुद्ध भएको हो ।
राजमार्ग अबरुद्ध भएपछि सिन्धुलीको पूर्वी क्षेत्रसहित खोटाङ्, सोलुखुम्बु, ओखलढुङ्गा, उदयपुर, रामेछाप लगायतका जिल्लामा यातायात सेवा प्रभावित भएको छ । आफ्नो गन्तव्यमा हिँडेका यात्रुहरु बीच बाटोमै अलपत्र परेका छन् ।
साउन साउन २० गते रातीदेखि खस्न सुरुभएको पहिरो अहिले सम्म नरोकिएपछि राजमार्ग खुलाउन समस्या भएको ईलाका प्रहरी कार्यालय खुर्कोट सिन्धुलीले जनाएको छ ।
काठमाडौंबाट पूर्वतर्फ छुटेका गाडीलाई खुर्कोटमा र पूर्वबाट काठमाडौं छुटेका गाडीलाई सिन्धुलीकै ग्वाल्टारमा रोकेर राखेको ईलाका प्रहरी कार्यालय खुर्कोटका प्रहरी नायब निरीक्षक राजेन्द्र न्यौपानेले जानकारी दिनुभयो ।
मौसममा सुधार आई पहिरो खस्न रोकिएपछि मात्रै राजमार्ग खुलाउन प्रयास थालिने उहाको भनाई छ ।
