काठमाण्डौ, २१ साउन ।
नयाँ संविधानको प्रारम्भिक मस्यौदामा जनताको सुझाव अनुसार परिमार्जनको गृहकार्यमा जुटेका प्रमुख दलहरुले पहाडमा चार र तराई–मधेसमा दुई गरी ६ प्रदेशमा सहमति जुटाउन अन्तिम गृहकार्य गरीरहेका छन ।
स्रोतले दिएको जानकारी अनुसार, मधेसलाई पहाडसँग नजोडी प्रदेश निर्माण गर्न समेत प्रमुख दलहरुबिच सैद्धान्तिक सहमति भएको छ । सप्तरीलाई पूर्वी पहाडी जिल्लासँगै राख्ने वा मधेस प्रदेशमै राख्ने भन्ने मुख्य बिषयमा सहमति जुट्न बाँकी रहेको बैठकमा सहभागी एक नेताले जनाएका छन ।
दलहरुले मध्य तराईका बारा, पर्सा, रौतहट, सर्लाही, महोत्तरी, धनुषा, सिराहालाई पहाडी क्षेत्रमा नजोडेर प्रदेश बनाउने तयारी गरेका हुन् । त्यस्तै, नवलपरासीदेखि बर्दियासम्म अलग प्रदेश बनाउँदा समेत पहाडी भूभागसँग नजोडिने सम्भावना छ ।
नेकपा एमाले भने मधेसका प्रदेशलाई पहाडसँग नजोड्ने बिषयमा सहमत छैन । फोरम लोकतान्त्रिकका अध्यक्ष विजय गच्छदारले सप्तरीलाई पनि पूर्वी प्रदेशमा राख्नुपर्ने अडान लिइरहनुभएको छ । कांग्रेस बरिष्ठ नेता शेर बहादुर देउवा र एमाले उपाध्यक्ष रावलले कैलाली र कञ्चनपुरलाई समेट्ने विषयमा लविङ गरिरहनु भएको छ ।
स्रोतका अनुसार, पूर्वी पहाडीमा सप्तरीलाई राख्ने वा नराख्ने, कैलालीलाई मधेसमा राख्ने वा नराख्ने लगायत बिषयमा निष्कर्षमा पुग्न नसक्दा सहमतिले अन्तिम रुप पाउन नसकेको हो । दलहरुले प्रस्तावित प्रदेश र जिल्ला संरचना गोप्य नै राखेका छन ।
आज अपरान्हसम्म सहमति बन्ने आधार तयार भएको स्रोतले बताएको छ । सहमति भएमा आजै संवाद समितिको बैठक बोलाइने भएको छ ।
