काठमाडौ २० साउन ।
सरकारको उच्च प्राथमिकतामा रहेको प्यूठान–बागलुङ सडकको ट्रयाक खोल्ने कार्य सम्पन्न भएको छ । सडकको ट्र्याक खोल्ने कार्य सम्पन्न भएसँगै यस आर्थिक वर्षमा सडकको चौडा पार्ने र पर्खाल तथा जाली लगाउने काम हुने सडक डिभिजन कार्यालय जस्पुरले जनाएको छ ।
आर्थिक वर्ष २०७१÷७२ मा तीन करोडसम्म काम गर्न सक्ने गरी बहुवर्षीय योजनामा समावेश भएको सडकको झन्डै रु ७० लाख लागतमा ट्र्याक खोल्ने कार्य सकिएको डिभिजन प्रमुख घनश्याम गौतमले बताउनु भयो ।
सडक विभागले कामको आधारमा बजेट थप गर्ने गरी बजेटको व्यवस्था गरेको गौतमको भनाई छ । सडक डिभिजन कार्यालय प्यूठानमा प्यूठान–बागदुला–ठूलाबेसी–भीमगिठे–बागलुङ–मुक्तिनाथ सडकका लागि भन्दै पछिल्लो एक वर्षमा १४ लाख रूपैयाँ बजेटको अख्तियारी आएको थियो ।
तर सरकारले सडकको कार्यप्रगतिका आधारमा खर्च गर्नसक्ने गरी तीन करोडसम्मको काम गर्न अनुमति दिँदै बहुवर्षीय योजनामा समावेश गरेपछि सडक निर्माणमा सहज भएको डिभिजन कार्यालयले जनाएको छ
