काठमाडौं १९ साउन ।
न्यायाधीश अभावले यस वर्ष सर्वोच्च अदालतको कुल मुद्दा फछ्र्योटमा कमी आएको छ ।
आर्थिक वर्ष ७१÷७२ मा नयाँ दर्तासहित कुल २८ हजार दुई सय १७ मुद्दामध्ये मात्र ६ हजार तीन सय ५६ फछ्र्योट भएको छ ।
सर्वोच्चमा अब कुल २१ हजार आठ सय ६१ मुद्दा किनारा लाग्न बाँकी छ ।
गत आर्थिक वर्षमा दर्ता भएका कुल २४ हजार सात सय २४ मुद्दामध्ये पाँच हजार नौ सय ४८ मुद्दाको अन्तिम टुंगो लागेको थियो ।
प्रतिन्यायाधीशको फछ्र्योट अनुपात भने यसवर्ष बढेको छ । न्यायाधीशको सक्रियताले छिटो न्याय प्राप्तिमा सुधार सँगै यसवर्ष प्रतिन्यायाधीश फछ्र्योट दर पाँच सय ७८ पुगेको हो । गत वर्ष प्रतिन्यायाधीश फछ्र्योट दर चार सय ५८ मात्र रहेको थियो ।
यस्तै यस वर्ष सर्वोच्चमा तीन हजार चार सय ९३ मुद्दा बढेका छन् । गत वर्ष सर्वोच्चमा प्रधानन्यायाधीश सहित १३ न्यायाधीश थिए । संविधानतः १५ स्थायी हुनुपर्नेमा पछिल्लो वर्ष घटेर ११ मा सीमित भएको छ ।
