काठमाडौ १२ साउन
अमेरिकाले नेपाल बाध्यात्मक श्रम तथा यौन व्यापारका लागि मानव तस्करीको मुख्य स्रोत तथा गन्तव्य भएको एक प्रतिवेदनमा उल्लेख गरेको छ ।
अमेरिकी विदेशमन्त्री जोन केरीले अमेरिकामा हिजो साँझ सार्वजनिक गरेको ट्राफिकिङ इन पर्सन्स २०१५ प्रतिवेदनको नेपाल खण्डमा नेपाली महिला तथा बालबालिकाहरू नेपालभित्रै तथा अमेरिका, भारत, मध्यपूर्वी मुलुक, एसियाली र अफ्रिकी मुलुकमा अवैध यौन व्यापारमा संलग्न रहेको उल्लेख छ ।
प्रतिवेदनका अनुसार नेपाली महिला तथा बालबालिकाहरू ती देशहरूमा निर्माण कम्पनी, उद्योगहरू, खानीहरू, घरेलु काममा तथा युवाहरू मनोरञ्जन गर्ने उद्योगहरूमा बाध्यात्मक श्रममा फसिरहेको देखिएको छ ।
विशेषगरी छिमेकी मुलुक भारतको बाटो हुँदै आफैं या दलालको विश्वासमा परेर गैरकानुनी रूपमा अर्को मुलुक प्रवेश गर्ने आप्रवासी नेपाली कामदारहरू बाध्यात्मक श्रमको सिकारमा परिरहेको प्रतिवेदनमा जनाइएको छ ।
