काठमाण्डौ, २६ असार ।
सरकारले आर्थिक वर्ष २०७२,७३ को वाषिर्क बजेट असार २९ गते सार्वजनिक गर्ने भएको छ ।
सभामुख सुवास नेम्वाङले बजेट असार २९ गते पेश गर्ने जानकारी सरकारले दिएको बताउनुभयो । बजेट एक दिन ढिला हुँदा सभासदहरु जनमत संकलनका लागि जाने दिन पनि सरेको छ ।
‘असार २८ गते बजेट ल्याउन आग्रह गरेको थिएँ,त्यसो गर्दा सभासदहरु संविधानमा जनमत संकलनका लागि पहिलेनै जान पाउने थिए, तर सरकारले त्यो दिन सकिदैन भन्यो’ नेम्वाङले भन्नुभयो ।
बजेट पेश भएर पेश्की बजेट पारित गरेपछिमात्र सभासदहरु जिल्ला जान पाउने भएकाले साउन १ गतेमात्र उनीहरु निर्वाचन क्षेत्रहरुमा परिचालित हुनेछन् ।
नीति तथा कार्यक्रममाथि सभासदहरुले उठाएका प्रश्नको जवाफ प्रधानमन्त्री सुशील कोइरालाले आइतवार दिनुहुनेछ । शनिवार राति नै जवाफ दिने भने पनि सरकारको तयारी नपुगेका कारण आइतवार अपरान्ह १ बजे तोकिएको नेम्वाङले बताउनुभयो ।
