काठमाडा,१९ असार ।
विदेशी पर्यटकको ओईरो लाग्ने हिमाली जिल्ला ताप्लेजुङको सदरमुकाम फुङलिङ वैशाख दोस्रो हप्तादेखि सुनसान बनेको छ ।
विश्वको तेस्रो अग्लो हिमाल कञ्चनजंघा र कुम्भकर्ण हिमालको काखमा अविस्थित उक्त जिल्ला पर्यटकीय मौसममा पनि पर्यटक बिहीन बनेको हो ।
गत वैशाख १२ को विनाशकारी भूकम्पका कारण अघिल्लो वर्षको तुलनामा यस पर्यटकको संख्यामा गिरावट आएको कञ्चनजंघा संरक्षण क्षेत्र आयोजनाका सचिव तेन्जिङ शेर्पाले बताउनुभयो ।
असार महिनासम्ममा विदेशी पर्यटकको घुईंचो लाग्ने यस क्षेत्रमा यस वर्ष पर्यटक आगमनमा ठूलो गिरावट आएको छ ।
जिल्लामा रहेको एक मात्र विमान स्थल मर्मत तथा धावन मार्ग कालोपत्रे गर्न भनी २ वर्षदेखि उडान नहुँदा यस क्षेत्रमा पर्यटकको कमी आएको शेर्पाको भनाई छ ।
पर्यटकीय क्षेत्र सुनसान बनेपछि कञ्चनजंघा क्षेत्रको घुन्सा, ओलाङचुङगोला, ग्याव्ला, फले क्षेत्रका होटल व्यवसायी निराश बनेका छन् ।
