काठमाडौं, १० असार ।
सरकारले औषधिलगायत खाद्यान्नको मूल्य अनिवार्य तोक्नुपर्ने व्यवस्था गर्न लागेको छ ।
औषधिजन्यलगायत खाद्यान्नमा मनोमानी मूल्य असुल्न थालेपछि वाणिज्य तथा आपूर्ति व्यवस्थापन विभागले यस्तो नियम लागू गर्न लागेको हो । विभागले पत्रपत्रिकामा सूचना निकालेर यस्तो व्यवस्था गर्न लागेको जनाएको छ ।
विभागका महानिर्देशक शम्भु कोइरालाका अनुसार बजार नियन्त्रण गर्न मूल्य अनिर्वाय तोक्न पर्ने व्यवस्था गर्न लागिएको हो ।
उहाले औषधि व्यवस्था विभागसँग भएको छलफलपश्चात यस्तो व्यवस्था लागू गर्न लागेको बताउनुभयो । पत्रपत्रिकामा सूचना एक–दुई दिनमै सार्वजनिक गरिने विभागले जनाएको छ ।
आयात हुने अधिकांश सर्जिकल सामग्रीमा मूल्य उल्लेख नगरिएको पाइएकोले सोहि मौका छोपी केही व्यवसायीहरूले बढी मूल्य असुल्ने गरेको भन्दै विभागले औषधिमा मूल्य उल्लेख भए मूल्य विश्लेषण गर्न पनि सजिलो हुने ठहर छ ।
यस्तै भूकम्पयता केही व्यवसायीले खाद्यान्न, औषधि र निर्माण सामग्रीलगायत उपभोग्य वस्तुहरूमा बढी मूल्य लिई बिक्री वितरण गरेको गुनासो आएकाले त्यस्तो कार्य नगर्न भनेको छ ।
बढी मूल्य लिएको फेला परे जफत गरी कानुनबमोजिम कडा कारबाही गरिने विभागले जनाएको छ ।
