काठमाण्डौ,१६ जेठ ।
म्याग्दीमा थुनिएर कालीगण्डकीमा बनेको ताल फुटाउन नेपाली सेनाको प्राविधिक टोली असफल भएको छ । लगातार तीनदिन देखि विस्फोट गरेर तालको सतह घटाउने प्रयास गरेपनि सोचे अनुरुप प्रगति नभएपछि सेनाको प्राविधिक टोलीले काम बन्द पनी गरेको छ ।
बुधबार र बिहीबार ७ वटा विस्फोट गराइएपछि तालको पानी निकासा हुने बाटो खुल्न नसक्दा काम रोकिएको प्रमुख जिल्ला अधिकारी टेकबहादुर केसीले जानकारी दिनुभयो ।
हप्ताअघि खसेको पहिरोले कालीगण्डकी १७ घण्टा थुनिएको थियो । नदी बग्न थालेपनि अझै सात सय मिटर लामो र एकसय मिटर गहिरो ताल यथावत छ । ताल पूर्णरुपमा फुटाउन नसक्दा कालीगण्डकी तटीय क्षेत्रमा अझै जोखिम टरि सकेको छैन ।
कालीगण्डकी थुनिएदेखि नै बेनी–जोमसोम सडकखण्डमा सीधा यातायात अवरुद्ध छ । कृत्रिम ताल फुटाउन इन्द्रवक्स गणको समन्वयमा कम्व्याट इञ्जिनियर सहित २० जनाको टोली खटेको थियो । सडक विभागले सडक सुचारु गर्न कम्तिमा २० दिन लाग्ने जनाएको छ ।
