काठमाण्डौ, ११ जेठ ।
गोरखा केन्द्र बनाएर गएको पाँच रेक्टर स्केलको पराकम्पनका कारण चितवनमा एक जनाको मृत्यु भएको छ ।
आज बिहान ३ बजेर २३ मिनेट जाँदा गोरखालाई केन्द्रबिन्दु बनाएर पराकम्पनका कारण दारेचोक–९ धारापानीका ६५ वर्षकी लाटीमाया चेपाङको मृत्यु भएको जिल्ला दैवी प्रकोप उद्धार समिति चितवनले जानकारी दिएको छ ।
चेपाङ बिहान पराकम्पन गए लगतै बेहोस भएका र उपचारका लागि लैजाने तयारी गर्दा गर्दै मृत्यु भएको समितिले जनाएको छ । योसँगै चितवनमा भूकम्पका कारण ज्यान जानेको संख्या १० पुगेको छ ।
उता दोलखामा १४ दिनदेखि पहिरोमा पुरिएरका एक वृद्धको शव आज उत्खलन गरिएको छ । गत वैशाख २९ गतेको पराकम्पनपछि आएको पहिरोमा पुरिएका सुरी गाविस–२ का ७३ वर्षीय चेतबहादुर गुरुङको शव उत्खनन गरिएको हो ।
गाईबस्तु चराउन गएका गुरुङको शव सुरी गाविसको खहरे भिरबाट नेपाली सेनाको टोलीले उत्खनन गरिएको चरीकोटस्थित बर्दबहादुर गणका सेनानी रोशन पन्तले जानकारी दिनुभयो ।
वैशाख १२ गते गएको विनाशकारी भूकम्प र त्यसपछि निरन्तर गइरहेका पराकम्पनबाट जिल्लामा मृत्यु हुनेको संख्या १७५ पुगेको जनाईएको छ ।
