काठमाण्डौ, ८ जेठ ।
प्रधानमन्त्री सुशील कोइरालाले सभासद् कृपासुर शेर्पालाई मन्त्री पदमा नियुक्त गर्नुभएको छ । उहाँले आज संविधानको धारा ३८ को उपधारा ५ बमोजिम शेर्पालाई नियुक्त गर्नुभएको हो ।
कोईरालाले शेर्पालाई मन्त्री पदमा नियुक्त गर्दै संस्कृति, पर्यटन तथा नागरिक उड्डयन मन्त्रालयको कार्यभार सम्हाल्ने गरी तोक्नुभएको प्रधानमन्त्रीका प्रेस संयोजक प्रकाश अधिकारीद्वारा जारी प्रेस विज्ञप्तिमा जनाइएको छ ।शेर्पालाई आजै साँझ राष्ट्रपति भवन शीतल निवासमा सपथ गराइने जनाइएको छ ।
एमालेबाटै नियुक्त दीपकचन्द्र अमात्यले राजीनामा दिएपछि भोजपुर क्षेत्र नं. १ बाट निर्वाचित शेर्पालाई पर्यटन मन्त्रालयको जिम्मेवारी दिईएको हो ।
त्यस्तै प्रधानमन्त्री कोइरालाले संस्कृति, पर्यटन तथा नागरिक उड्डयन मन्त्री दीपकचन्द्र अमात्यले आफ्नो पदबाट दिनुभएको राजीनामा स्वीकृत गर्नुभएको छ ।
प्रधानमन्त्री कोइरालाले उहाँलाई हालसम्म गर्नुभएको कामका लागि धन्यवाद दिनुभएको छ ।
