काठमाण्डौ,७ जेठ ।
भूकम्पपछिको नेपालको अवस्था तथा पुनर्निर्माण एवम् राहतको अवस्थाबारे बुझ्न चीनका परराष्ट्र सहायक मन्त्री लिउ जेनचाओ आज नेपाल आउनु भएको छ । ११ सदस्यीय प्रतिनिधिमण्डलको नेतृत्व गर्दै उहाँ दुईदिने भ्रमणका लागि आउनु भएको नेपालस्थित चिनिया दूतावासले जनाएको छ ।
सहायक मन्त्री लिउले प्रधानमन्त्री सुशील कोइराला र परराष्ट्रमन्त्री महेन्द्रबहादुर पाण्डेसँग बेग्लाबेग्लै भेटवार्ता गर्ने कार्यक्रम छ । चिनियाँ दुतावासका अनुसार वैशाख २९ गतेको भूकम्पपछि पनि चीनले घोषणा गरेको १४ करोड युआन बराबरको राहत सामग्री काठमाडौं ल्याउनेक्रम सुरु भएको छ ।
हिजो नै विशेष विमानबाट ती सामग्री राजधानी ल्याइएको छ । त्यसैगरी चिनियाँ जनमुक्ति सेनाले भुकम्प पीडित प्रभावकारी एवम् सहज रुपमा उपचार सेवा उपलब्ध गराउन नेपाली सेनालाई २४ वटा घुम्ती अस्पताल उपकरणसहित प्रदान गरेको छ ।
